Komisioni i Disiplinës dhe Etikës i FSHF-së ka publikuar vendimet e fundit për futbollin shqiptar, ku ndër dënimet më të rëndësishme është ai ndaj trajnerit të Dinamo City, Ilir Daja.
Tekniku i skuadrës kryeqytetase është dënuar me katër ndeshje pezullim nga aktiviteti për sjellje josportive ndaj zyrtarëve të ndeshjes, pas incidenteve të ndodhura në javën e fundit të kampionatit.
Përveç Dajës, Komisioni i Disiplinës ka ndëshkuar edhe zyrtarin e Besës, Romeo Bizhdili, i cili gjithashtu është pezulluar për katër ndeshje. Sipas vendimit të FSHF-së, ai ka shkelur rregullat e sjelljes sportive duke hyrë në fushën e lojës në mënyrë të paautorizuar dhe të parregullt.
Vendimet janë marrë në bazë të rregullores disiplinore të Federatës Shqiptare të Futbollit, ndërsa pritet të ndikojnë në vazhdimësinë e garës në javët e mbetura të sezonit.
Dënimi i Ilir Dajës konsiderohet një goditje e rëndësishme për Dinamon në fazën vendimtare të kampionatit shqiptar.
