Drita ka marrë një fitore të vështirë, por shumë të rëndësishme në garën për titull, duke mposhtur Drenicën me rezultat minimal 1-0.
Skuadra gjilanase hasi në rezistencë të fortë nga mysafirët, sidomos në pjesën e parë, ku nuk arriti të krijojë epërsi dhe u shfaq pa ide të qarta në fazën sulmuese.
Megjithatë, në fraksionin e dytë bardhekaltërit rritën presionin dhe kërkuan me ngulm golin e fitores. Vendimi i takimit erdhi në minutën e 92-të, kur kapiteni Besnik Krasniqi realizoi golin që i dha tri pikë të arta Dritës, duke shpërblyer këmbënguljen e ekipit deri në sekondat e fundit.
Me këtë fitore, Drita ngjitet në kuotën e 35 pikëve në vendin e dytë, vetëm një pikë më pak se Ballkani, që kryeson tabelën, por me një ndeshje më pak të zhvilluar.
Prishtina mban vendin e tretë me 33 pikë, gjithashtu me një ndeshje më pak. Në anën tjetër, Drenica mbetet në pozitën e tetë me 21 pikë, duke vazhduar betejën për pozicionim më të mirë në renditje.
