Presidenti i FSHF-së, Armand Duka, ka lënë të hapur të ardhmen e trajnerit të Kombëtares shqiptare, Silvinjo, duke theksuar se vendimi final do të merret para ndeshjeve të qershorit.
Në një konferencë për media, Duka vlerësoi pozitivisht rrugëtimin e Shqipërisë në kualifikuese, duke theksuar se skuadra ka bërë paraqitje të mira, pavarësisht disa ndeshjeve që nuk përmbushën pritshmëritë.
Ai theksoi se objektivi për vendin e dytë në grup ishte arritur, ndërsa përballjet me kundërshtarë të fortë si Polonia dhe Anglia treguan rritjen e ekipit në arenën ndërkombëtare.
Sipas Dukës, rezultatet historike, vendi i parë në grup në Evropian dhe i dyti në Botëror janë dëshmi e progresit të ekipit dhe stafit teknik.
Megjithatë, ai konfirmoi se e ardhmja e Silvinjos mbetet ende e hapur.
“E kam pyetur trajnerin si e ndjen veten për të vazhduar. Sipas mendimit tim, ai ka ende energji për ta udhëhequr këtë skuadër,” u shpreh Duka.
Presidenti i FSHF-së shtoi se trajneri do të marrë kohën e nevojshme për të reflektuar, ndërsa federata do të vendosë përfundimisht nëse do të vazhdojë bashkëpunimi apo do të ketë ndryshim në pankinë.
Duka gjithashtu sqaroi se kontrata aktuale ishte e lidhur me ciklin e kualifikueseve dhe nuk mund të zgjatej deri në mars, pasi kjo do të kishte ndikim negativ në motivimin e skuadrës.
Në fund, ai theksoi se diferencat mes skuadrave janë minimale dhe se përgatitja psikologjike dhe besimi janë elemente kyçe për suksesin.
