Lionel Messi duket se po e zgjeron ndikimin e tij në futboll edhe jashtë fushës së lojës. Sipas raportimeve të “ElNacionalcat”, argjentinasi, i cili tashmë është bashkëpronar i klubit spanjoll UE Cornellà, ka marrë vendimin e parë të madh strategjik duke nisur projektin për krijimin e ekipit të femrave.
Raporti thekson se skuadra e re do të funksionojë fillimisht e ndarë nga strukturat aktuale të klubit dhe do të menaxhohet nga UE Cornellà Foundation. Qëllimi afatgjatë është ndërtimi i një seksioni të plotë të futbollit të femrave, i cili do të jetë pjesë zyrtare e klubit në të ardhmen.
Messi besohet se e sheh këtë projekt si një hap të rëndësishëm për zhvillimin e futbollit të femrave në Spanjë, por edhe si pjesë të vizionit të tij për të ndërtuar një model modern dhe gjithëpërfshirës të klubit.
UE Cornellà, klub që garon në kategoritë më të ulëta të futbollit spanjoll, pritet të përfitojë jo vetëm nga investimet financiare, por edhe nga vëmendja ndërkombëtare që sjell emri i Messit. Projekti i ri konsiderohet si një sinjal se legjenda argjentinase po mendon seriozisht për të ardhmen e tij në menaxhim dhe investime sportive pas karrierës si lojtar.
Krijimi i ekipit të femrave shihet gjithashtu si një lëvizje strategjike për të rritur identitetin dhe ndikimin social të klubit, në një periudhë kur futbolli i femrave po përjeton rritje të madhe në Evropë dhe në mbarë botën.
