Futbollistja kosovare Gentiana Fetaj ka nisur një kapitull të ri në karrierën e saj, duke u transferuar te klubi zviceran Luzern.
Mesfushorja me prirje ofensive do të jetë pjesë e Luzernit për pjesën e mbetur të sezonit 2025/26, ku pritet të japë kontribut në repartin sulmues me kreativitetin dhe përvojën e saj.
23-vjeçarja vjen në Zvicër pas aventurës së fundit në Shtetet e Bashkuara të Amerikës, ku ishte pjesë e ekipit universitar South Florida Bulls. Ajo është e lindur në Gjermani, ndërsa rrënjët i ka nga Kosova.
Fetaj ka një të kaluar të pasur në futbollin evropian, pasi ka qenë pjesë e përfaqësueseve të Gjermanisë nga grupmosha U15 deri në U19, me gjithsej 23 paraqitje. Kulmi i kësaj periudhe ishte triumfi në Kampionatin Evropian U17 në vitin 2019.
Në nivelin e përfaqësueseve seniore, ajo ka zgjedhur të përfaqësojë Kosovën, me të cilën deri më tani ka zhvilluar katër ndeshje dhe ka realizuar një gol.
Transferimi te Luzerni shihet si një hap i rëndësishëm në karrierën e Fetajt, e cila synon të vazhdojë zhvillimin dhe të lërë gjurmë në kampionatin zviceran.
