Raportimet e fundit nga mediat italo-gjermane kanë bërë të ditur se drejtori sportiv i Milanit, Igli Tare, ka shfaqur interes konkret për mesfushorin defensiv Leon Avdullahu, aktualisht pjesë e Hoffenheimit. Megjithatë, tentativa e kuqezinjve ka hasur në një refuzim të prerë nga klubi i Bundesligës.
Për mesfushorin shqiptar të Kosovës, një transferim te Milani do të përfaqësonte hapin më të madh të karrierës, duke i dhënë mundësinë të afirmohej në një klub historik që synon trofe dhe ka ambicie të larta në arenën europiane.
Sidoqoftë, Hoffenheim ka qenë i qartë në qëndrimin e tij, duke bërë të ditur se Avdullahu nuk është në shitje në këtë fazë. Sipas mediave gjermane, drejtuesit e klubit shohin tek lojtari një aset me vlerë në rritje dhe synojnë të përfitojnë maksimalisht financiarisht nga një shitje e mundshme në të ardhmen.
Madje, bëhet e ditur se në rastin e interesimit të Milanit, palës italiane nuk i është dhënë as mundësia për një takim zyrtar apo negociata të drejtpërdrejta, çka tregon vendosmërinë e Hoffenheimit për ta mbajtur mesfushorin shqiptar në skuadër.
Situata mbetet për t’u ndjekur, ndërsa Avdullahu vazhdon të jetë një nga emrat më të përfolur shqiptarë në Bundesligë.
