Prishtina ka regjistruar fitore bindëse 4-1 ndaj Llapit, në kuadër të javës së 20-të të Superligës së Kosovës, në përballjen e zhvilluar në stadiumin “Stadiumi Fadil Vokrri”.
Mysafirët e nisën më mirë takimin dhe kaluan të parët në epërsi në minutën e 7-të. Ish-sulmuesi i ardhur nga KF Shkëndija, Fiton Ademi, realizoi një gol spektakolar me goditje akrobatike për 0-1.
Megjithatë, reagimi i kryeqytetasve ishte i menjëhershëm. Në minutën e 35-të, Valmir Veliu barazoi shifrat në 1-1, duke rikthyer Prishtinën në lojë. Vetëm dy minuta më pas, Mario Ilievski përfitoi nga një tollovi në zonë dhe realizoi nga afërsia për 2-1, rezultat me të cilin u mbyll pjesa e parë.
Në fraksionin e dytë, Llapi provoi të rikthehej në ndeshje, por Prishtina u tregua e rrezikshme dhe vrasëse në kundërsulm. Në minutën e 70-të, Veliu shënoi golin e dytë personal pas asistimit të Albin Krasniqit, duke çuar rezultatin në 3-1.
Vetëm tre minuta më vonë, Ilievski kompletoi dopietën e tij pas një pasimi të bukur nga Ramiz Bytyqi, duke vulosur përfundimisht fitoren 4-1.
Me këtë triumf, Prishtina ngjitet në kuotën e 36 pikëve, aq sa ka edhe Ballkani në krye të tabelës, ndërsa Llapi mbetet në vendin e shtatë me 22 pikë.
