Skitarja kosovare Kiana Kryeziu ka shënuar paraqitjen e saj të parë në Lojërat Olimpike Dimërore “Cortina-Milano 2026”, duke përfaqësuar Kosovën në disiplinën e Super-G. Në garën e saj debutuese, ajo nuk arriti ta përfundojë lëshimin pasi doli nga shtegu, duke e mbyllur para kohe sfidën e parë olimpike. Kryeziu ishte garuesja e parafundit që startoi në këtë disiplinë.
Pavarësisht kësaj, aventura e saj olimpike vazhdon. Ajo pritet të garojë edhe në sllallomin e madh më 15 shkurt, si dhe në sllallom më 18 shkurt, ku do të synojë një paraqitje sa më të suksesshme për ngjyrat e Kosovës.
Në “Cortina-Milano 2026” Kosova përfaqësohet edhe nga skitari Drin Kokaj. Ai do të konkurrojë në disiplinën e sllallomit më 16 shkurt, duke kompletuar kështu pjesëmarrjen e ekipit kosovar në këtë edicion të Lojërave Dimërore.
Për Kosovën, kjo është hera e tretë që merr pjesë në Lojërat Olimpike Dimërore, ndërsa në këtë edicion përfaqësohet nga dy skitarë: Kiana Kryeziu dhe Drin Kokaj.
