Futbollistja e njohur suedeze me origjinë kosovare, Kosovare Asllani, ka shqetësuar tifozët me një reagim emocional pas dëmtimit të rëndë të pësuar në ndeshjen e fundit me klubin e saj.
Ylli i Kombëtarja e Suedisë në futboll për femra e përshkroi momentin si një përjetim të fortë emocional dhe fizik, duke lënë të hapur edhe dilema për vazhdimësinë e karrierës.
“Dëmtimi ndodhi në minutën e 97-të dhe në një moment gjithçka ndryshoi. Të zgjohesh dhe të ndjesh gishtat e këmbëve, të prekësh fashën e gjurit dhe të shohësh lotët që rrjedhin pa ndal… nuk është e lehtë të përshkruhet,” ka shkruar Asllani në rrjetet sociale.
Ajo theksoi se futbolli i ka dhënë gjithçka në jetë, por përballja me një situatë të tillë në këtë fazë të karrierës është ndër më të vështirat. Megjithatë, mesfushorja me përvojë u shpreh se beson se sfidat më të mëdha sjellin edhe mësimet më të rëndësishme.
“Gjithmonë kam besuar se jeta të mëson përmes momenteve më të vështira. Ndoshta kjo është diçka që duhet ta përjetoj, pavarësisht sa e dhimbshme është,” shtoi ajo.
Në fund, Asllani falënderoi të gjithë ata që i kanë qëndruar pranë në këtë periudhë të vështirë: “Faleminderit të gjithëve për mesazhet. Do të thotë më shumë sesa mund të shpreh me fjalë.”
