Khvicha Kvaratskhelia është shpallur lojtari më i mirë i edicionit 2025/26 në Ligën e Kampionëve. UEFA ia akordoi çmimin yllit gjeorgjian pas paraqitjeve spektakolare me Paris Saint-Germainin gjatë gjithë sezonit europian.
Sulmuesi i PSG-së ishte një nga protagonistët kryesorë të rrugëtimit drejt triumfit në Champions League, ndërsa kontributi i tij kulmoi edhe në finalen e Budapestit ndaj Arsenalit. Pikërisht Kvaratskhelia fitoi penalltinë që solli golin e barazimit për skuadrën franceze në momentet vendimtare të ndeshjes.
Ish-lojtari i Napolit e mbylli sezonin europian me statistika mbresëlënëse: 10 gola dhe 7 asistime në 16 paraqitje, duke qenë një nga lojtarët më dominues të kompeticionit.
Me këtë vlerësim, Kvaratskhelia konfirmohet si një nga yjet më të mëdhenj të futbollit europian dhe një nga figurat kyçe të suksesit historik të PSG-së në këtë edicion të Ligës së Kampionëve.
