Manchester United është eliminuar nga FA Cup, pasi u mposht me rezultatin 1-2 nga Brighton në një ndeshje ku “Djajtë e Kuq” patën më shumë dominim në lojë, por mungesa e konkretizimit rezultoi vendimtare. Brighton kaloi në epërsi që në minutën e 11-të, kur Brajan Gruda, sulmuesi me origjinë shqiptare, shfrytëzoi një top brenda zonës për të zhbllokuar rezultatin dhe për t’i dhënë avantazhin mysafirëve.
Në pjesën e dytë, Brighton u tregua sërish më efektiv. Në minutën e 63-të, Gruda u shndërrua në asistues, duke shërbyer saktë për Danny Welbeck, i cili dyfishoi shifrat dhe e vuri Manchester United në vështirësi serioze.
Reagimi i vendasve erdhi vonë. Në minutën e 85-të, Benjamin Šeško realizoi për 1-2 pas një krosimi të saktë nga Bruno Fernandes, duke rihapur shpresat për United. Megjithatë, minutat e mbetura nuk mjaftuan për të shmangur eliminimin. Situata u komplikua edhe më shumë për Manchester United në minutën e 89-të, kur Lacey u ndëshkua me kartonin e dytë të verdhë, duke lënë skuadrën me 10 lojtarë në minutat e fundit të takimit.
Brajan Gruda u shpall lojtari më i vlerësuar i ndeshjes, duke dhënë një kontribut vendimtar në kualifikimin e Brightonit në fazën tjetër të FA Cup.
Ky eliminim përfaqëson një tjetër zhgënjim për Manchester United në këtë sezon, ndërsa Brighton vazhdon me ambicie rrugëtimin në kompeticionin më të vjetër të futbollit anglez.
