Inter Miami ka konfirmuar se Lionel Messi po përballet me një lëndim muskulor, vetëm dhjetë ditë para startit të sezonit të ri në Major League Soccer. Ylli argjentinas nuk ka marrë pjesë në seancat e fundit stërvitore, ndërsa klubi ka bërë të ditur se bëhet fjalë për një problem të pësuar gjatë një ndeshjeje miqësore.
Sipas njoftimit të klubit amerikan, Messi e ka ndier shqetësimin fizik në takimin e zhvilluar javën e kaluar në Ekuador ndaj Barcelona SC. Stafi mjekësor është duke e monitoruar nga afër gjendjen e tij, ndërsa rikthimi në stërvitje do të bëhet në mënyrë graduale, varësisht nga evoluimi i rehabilitimit.
Aktualisht nuk është përcaktuar një afat i saktë për rikuperimin, çka e vë në pikëpyetje pjesëmarrjen e tij në përballjen e afërt kundër Los Angeles FC. Situata po ndiqet me vëmendje edhe nga përfaqësuesja e Argjentinës, në prag të impenjimeve ndërkombëtare që e presin kampionin e botës.
