Skeletisti ukrainas, Vladyslav Heraskevych, një nga pretendentët për medalje në Lojërat Olimpike Dimërore “Milano-Cortina 2026”, nuk u lejua të garojë pasi refuzoi të heqë helmetën e tij simbolike që nderon sportistët ukrainas të vrarë në luftën me Rusinë.
Vendimi u mor rreth 45 minuta para nisjes së garës, pas një paralajmërimi me shkrim nga Federata Ndërkombëtare e Bobsleit dhe Skeletonit (IBSF), e cila theksoi se mbajtja e helmetës ishte në kundërshtim me Kartën Olimpike dhe rregullat për shprehjet në fushën e lojës. Në helmetë ishin të vendosura imazhet e më shumë se 20 sportistëve dhe trajnerëve ukrainas të rënë në luftë.
Komiteti Olimpik Ndërkombëtar (IOC) kishte lejuar përdorimin e helmetës gjatë stërvitjeve, por kërkoi që në garë të përdorej një tjetër. Si alternativë, atij iu ofrua mundësia të mbante një shirit të zi në krah ose ta shfaqte helmetën pas përfundimit të zbritjes, por Heraskevych vendosi të mos heqë dorë nga simboli i tij.
