Komiteti Ekzekutiv i UEFA-s ka miratuar disa ndryshime të rëndësishme për të ardhmen e futbollit europian, gjatë mbledhjes së mbajtur në Stamboll të Turqisë. Vendimet kryesore lidhen me formatin e ri të UEFA Nations League, eliminatoret e Kampionatit Europian dhe zgjerimin e përdorimit të tribunave në këmbë në stadiume.
Një nga ndryshimet më të mëdha është reforma e Nations League, e cila do të hyjë në fuqi pas EURO 2028. Kompeticioni nuk do të zhvillohet më me katër liga, por me tri liga nga 18 kombëtare secila. Çdo ligë do të ndahet në tri grupe me nga gjashtë skuadra, ndërsa ekipet do të përballen me gjashtë kundërshtarë të ndryshëm në format të ngjashëm me garat europiane të klubeve.
UEFA ka parashikuar gjithashtu një strukturë të re edhe për eliminatoret e Europianit. Liga 1 do të përbëhet nga 36 kombëtare të Ligave A dhe B të Nations League, ndërsa Liga 2 do të përfshijë skuadrat e mbetura. Kombëtaret do të ndahen në vazo dhe do të zhvillojnë ndeshje brenda dhe jashtë fushe kundër rivalëve të ndryshëm.
Sipas planit të ri, skuadrat më të mira të Ligës 1 do të sigurojnë direkt kualifikimin në turneun final, ndërsa vendet e tjera do të përcaktohen përmes një sistemi “play-off”, që do t’u japë mundësi edhe skuadrave të Ligës 2 për të ëndërruar kualifikimin.
Një tjetër vendim i rëndësishëm ishte zgjerimi i programit të tribunave në këmbë për sezonin 2026/27. Federatat që kanë përdorur këtë model në kampionatet e tyre elitare gjatë tri viteve të fundit do të mund ta aplikojnë atë në të gjitha kompeticionet e UEFA-s, përfshirë edhe garat europiane të klubeve.
UEFA bëri të ditur se koncepti final i këtyre reformave do të detajohet gjatë muajve të ardhshëm, ndërsa miratimi përfundimtar pritet në mbledhjen e Komitetit Ekzekutiv që do të mbahet më 15 shtator në Selanik të Greqisë.
