Punimet në ndërtimin e pishinës gjysmë-olimpike në Deçan po vazhdojnë me intensitet të lartë, duke shënuar një tjetër hap të rëndësishëm në përmirësimin e infrastrukturës sportive në vend.
Ky projekt, me vlerë investimi mbi 2 milionë euro, po realizohet me ritëm të shpejtë dhe synon krijimin e kushteve moderne për stërvitje, gara sportive dhe zhvillimin e sportistëve të rinj, si dhe promovimin e aktiviteteve rekreative për qytetarët.
Ministria e Kulturës, Rinisë dhe Sportit ka publikuar së fundmi fotografi nga punimet në terren, duke dëshmuar progresin e vazhdueshëm të projektit dhe angazhimin institucional për përfundimin e tij brenda afateve të planifikuara.
Sipas MKRS-së, investimet në infrastrukturën sportive mbeten prioritet, me qëllim të fuqizimit të sportit, rritjes së pjesëmarrjes së të rinjve në aktivitete fizike dhe promovimit të një jete aktive dhe të shëndetshme në të gjithë vendin.
Pishina gjysmë-olimpike në Deçan pritet të shërbejë si qendër e rëndësishme për sportet ujore, duke ofruar kushte bashkëkohore për klubet sportive, nxënësit dhe komunitetin lokal, si dhe duke hapur mundësi për organizimin e garave në nivel vendor dhe më gjerë.
