Liverpool do të duhet t’i paguajë Chelsea-t deri në 6.8 milionë funte për transferimin e talentit të ri Rio Ngumoha, ka raportuar The Athletic. Vendimi është marrë nga një tribunal i pavarur i Federatës Angleze të Futbollit (FA), i cili përcakton kompensimin financiar për transferimet e lojtarëve të rinj ndërmjet klubeve angleze.
Ngumoha, vetëm 17 vjeç, u largua nga akademia e Chelseat për t’iu bashkuar Liverpoolit, ndërsa klubi londinez kishte kërkuar një kompensim të konsiderueshëm për humbjen e një prej talenteve më premtuese të tij.
Sipas The Athletic, tribunali ka vendosur një strukturë pagesash të detajuar, ku Liverpooli do të paguajë fillimisht 2.8 milionë funte, ndërsa shuma totale mund të arrijë deri në 6.8 milionë funte, në varësi të realizimit të bonuseve të lidhura me paraqitjet dhe zhvillimin e lojtarit.
Marrëveshja përfshin gjithashtu një klauzolë që i garanton Chelseat 20 për qind të çdo fitimi nga një rishitje e mundshme në të ardhmen, duke i siguruar klubit londinez përfitime afatgjata nëse karriera e Ngumoha zhvillohet sipas pritshmërive.
Rio Ngumoha konsiderohet si një nga talentet më premtuese të brezit të tij në Angli, dhe Liverpooli ka investuar fort në të ardhmen e tij, duke pranuar vendimin e tribunalit si pjesë e strategjisë për ndërtimin afatgjatë të skuadrës
