Prishtina dhe Gjilani përballen sot në një nga ndeshjet më interesante të javës në Superligën e Kosovës, në një duel që mund të ndikojë drejtpërdrejt në garën për Evropë. Të dy skuadrat ndodhen pranë njëra-tjetrës në tabelë dhe kërkojnë pikë të mëdha në këtë fazë vendimtare të kampionatit.
Prishtina hyn në këtë sfidë nga vendi i tretë me 44 pikë pas 29 ndeshjeve të zhvilluara, me bilanc prej 12 fitoreve, 8 barazimeve dhe 9 humbjeve, ndërsa ka realizuar 43 gola dhe ka pranuar 39.
Në anën tjetër, Gjilani renditet në pozitën e pestë me 43 pikë, vetëm një më pak se bardhekaltrit. Gjilanasit kanë regjistruar 12 fitore, 7 barazime dhe 10 humbje, me golaverazh neutral 37:37.
Një fitore e Prishtinës do ta forconte pozitën e tretë dhe do ta mbante në garë për një vend që dërgon në garat evropiane, ndërsa triumfi i Gjilanit do t’i kalonte ata mbi Prishtinën në renditje.
Tashmë janë publikuar edhe formacionet zyrtare të të dy skuadrave, derisa pritet një përballje e zjarrtë në kryeqytet mes dy rivalëve që kanë objektiva të qarta deri në fund të sezonit.
