Federata e Basketbollit e Kosovës (FBK) ka besuar organizimin e finales së Kupës së Kosovës ekipit Rahoveci 029, duke vendosur që këtë superfinale ta zhvillojë në qytetin e Rahovecit.
Finalja do të përbëjë përballjen mes Trepçës dhe Bashkimit, dhe do të zhvillohet të mërkurën, më 18 shkurt, në palestrën “Mizahir Isma” nga ora 19:30.
Marrëveshjen për organizimin e finales e kanë nënshkruar Indrit Krasniqi, kryetar i KB Rahoveci 029, dhe Adriatik Rraci, Zëvendës Sekretar i Përgjithshëm dhe Drejtor i Përfaqësueseve të Kosovës. Të dyja palët kanë premtuar se do të bëjnë maksimumin që kjo ndeshje të jetë një spektakël i vërtetë i basketbollit kosovar.
Biletat për këtë finale do të kushtojnë 5 euro, dhe pritet të tërheqin një numër të madh tifozësh nga e gjithë Kosova.
