Një moment tensioni u shënua gjatë Kongresit të FIFA-s, ku presidenti i Federatës Palestineze të Futbollit, Jibril Rajoub, refuzoi të qëndrojë pranë një zyrtari izraelit në podium.
Ngjarja ndodhi gjatë punimeve të Kongresit të 76-të, kur presidenti i FIFA-s, Gianni Infantino, i ftoi përfaqësuesit në skenë. Pavarësisht përpjekjes së tij për t’i afruar, Rajoub refuzoi të afrohej me përfaqësuesin izraelit, duke krijuar një moment të dukshëm tensioni para të pranishmëve.
Sipas zëvendëspresidentes së Federatës Palestineze të Futbollit, Susan Shalabi, reagimi i Rajoub ishte i qëllimshëm dhe i qartë. Ajo theksoi se nuk mund të ketë një gjest simbolik si shtrëngimi i duarve në një situatë që, sipas saj, lidhet me vuajtjet e popullit palestinez.
Nga ana tjetër, Infantino bëri thirrje për dialog dhe bashkëpunim, duke theksuar se çështje të tilla kërkojnë qasje të përbashkët dhe mirëkuptim.
Pas përfundimit të kongresit, përfaqësuesit palestinezë kritikuan përpjekjen për një pajtim simbolik, duke e cilësuar atë të papërshtatshëm dhe larg realitetit të situatës.
Ndërkohë, çështja e klubeve izraelite në vendbanimet e Bregut Perëndimor mbetet një pikë e nxehtë përplasjesh. Federata Palestineze e Futbollit ka apeluar në Gjykatën e Arbitrazhit për Sport kundër vendimit të FIFA-s për të mos ndërmarrë masa.
FIFA, nga ana e saj, ka deklaruar se për momentin nuk do të ndërhyjë, duke argumentuar se statusi ligjor i territorit mbetet çështje e pazgjidhur në të drejtën ndërkombëtare.
