Më 15 prill të vitit 1989, futbolli botëror u trondit nga një prej tragjedive më të rënda në histori. Në stadiumin Hillsborough në Sheffield, gjatë ndeshjes së Kupës FA mes Liverpool dhe Nottingham Forest, humbën jetën 97 tifozë, ndërsa qindra të tjerë mbetën të plagosur.
Ndeshja u ndërpre pas vetëm gjashtë minutash, ndërsa situata në tribunat e mbushura me tifozë doli jashtë kontrollit. Një vendim i gabuar i policisë për hapjen e një porte hyrëse shkaktoi një fluks të pakontrolluar të njerëzve drejt sektorëve tashmë të mbingarkuar.
Tifozët që ndodheshin në pjesët e përparme të tribunës u shtynë fuqishëm drejt gardhit metalik, duke krijuar një presion fatal që çoi në humbjen e jetëve. Në vendngjarje humbën jetën 94 persona, ndërsa viktimat e tjera ndërruan jetë më vonë si pasojë e plagëve të marra.
Ndër viktimat ishte edhe 10-vjeçari Jon-Paul Gilhooley, kushëri i legjendës së Liverpool, Steven Gerrard.
Çdo vit, më 15 prill, Liverpool FC dhe komuniteti i futbollit përkujtojnë viktimat me minuta heshtje dhe ceremoni në “Anfield”, duke mbajtur gjallë kujtimin e një ngjarjeje që ndryshoi përgjithmonë standardet e sigurisë në stadiume.
Tragjedia e Hillsborough pati pasoja të mëdha edhe në arenën ndërkombëtare, duke çuar në reforma të thella në organizimin dhe sigurinë e ndeshjeve, si dhe në ndalimin e përkohshëm të tribunave në këmbë në futbollin anglez.
