Presidenti i Brazilit, Luiz Inácio Lula da Silva, ka bërë një deklaratë interesante lidhur me përzgjedhjen e Kombëtares për Kupën e Botës, duke përfshirë edhe emrin e Neymar.
Sipas tij, trajneri i ri i “Seleçaos”, Carlo Ancelotti, ka kërkuar mendimin e tij nëse Neymar duhet të jetë pjesë e listës finale.
“Pata mundësinë të flisja me Ancelottin dhe ai më pyeti: A mendon se Neymar duhet të thirret?”, zbuloi Lula gjatë një transmetimi të drejtpërdrejtë.
Presidenti brazilian theksoi se vendimi duhet të bazohet te forma fizike dhe dëshira e vetë lojtarit.
“Unë i thashë: Shiko, Ancelotti, nëse është fizikisht në formë, ai e ka talentin e duhur. Ajo që duhet të dihet është nëse ai e dëshiron vërtet”, u shpreh Lula.
Deklarata ka hapur debat në Brazil, pasi e ardhmja e Neymarit në Kombëtare mbetet e paqartë për shkak të problemeve fizike dhe formës së tij në sezonet e fundit.
