Juventusi ka vendosur që trajneri Luciano Spalletti të mos dalë në konferencën për shtyp para përballjes së rëndësishme ndaj Milanit në “San Siro”, duke ia lënë fjalën mbrojtësit brazilian Gleison Bremer.
Sipas mediave italiane, bardhezinjtë kanë ndjekur shpesh këtë praktikë gjatë sezonit, ku në konferencat para ndeshjeve kanë dërguar lojtarë të skuadrës, ndërsa trajneri ka folur vetëm pas përfundimit të takimeve.
Një rast i ngjashëm ndodhi edhe para ndeshjes ndaj Bolognas, kur përpara mediave doli kapiteni Manuel Locatelli.
Dueli ndaj Milanit konsiderohet vendimtar për Juventusin në garën për një vend në Ligën e Kampionëve sezonin e ardhshëm. Në rast fitoreje në “San Siro”, bardhezinjtë do të barazonin kuotën e pikëve me kuqezinjtë, duke e bërë edhe më të fortë garën për zonën Champions.
