Ernest Muçi ka dhuruar një tjetër paraqitje spektakolare, duke u shndërruar në heroin e Trabzonsporit në transfertë ndaj Kocaelispor. Sulmuesi kuqezi vendosi fatin e sfidës me një supergol në minutën e 91-të, duke i siguruar skuadrës së tij një fitore të madhe 2-1, në ndeshjen e vlefshme për javën e 18-të të Superligës turke.
Kur gjithçka po shkonte drejt një barazimi, Muçi mori përgjegjësinë mbi vete dhe me një goditje të saktë e të fuqishme, dërgoi topin në rrjetë, duke kompletuar përmbysjen dhe duke ndezur festën e tifozëve të Trabzonsporit.
24-vjeçari i Kombëtares shqiptare po kalon një sezon të jashtëzakonshëm, ku vazhdimisht po konfirmon vlerat e tij si një nga lojtarët më vendimtarë të ekipit. Me këtë gol, Muçi shkon në kuotën e 10 golave dhe 3 asistimeve në të gjitha kompeticionet këtë sezon, shifra që flasin qartë për ndikimin e tij në repartin ofensiv.
Paraqitjet e tij të shkëlqyera po e kthejnë Ernest Muçin në një nga emrat më të përfolur në kampionatin turk, ndërsa forma aktuale konfirmon se sulmuesi kuqezi është në kulmin e tij sportiv.
