Monchengladbach ka triumfuar bindshëm me rezultat 4:0 ndaj Hoffenheimit në javën e fundit të Bundesliga-s, duke i shuar skuadrës mysafire shpresat për pjesëmarrje në Champions League sezonin e ardhshëm.
Te Hoffenheimi u aktivizuan nga minuta e parë tre futbollistët e Kosovës, Fisnik Asllani, Leon Avdullahu dhe Albian Hajdari.
Hajdari u ndëshkua me karton të verdhë në minutën e 32-të, ndërsa Avdullahu në të 60-tën. Të dy u zëvendësuan në minutën e 67-të.
Për Monchengladbach shënuan Bolin në minutën e 14-të, Tabakoviq në të 23-tën, Diks në të 81-tën dhe Hack në minutën e parë shtesë.
Situata për Hoffenheimin u vështirësua edhe më shumë në fillim të pjesës së dytë, pasi Lemberle u përjashtua me karton të kuq pas dy kartonëve të verdhë.
Me këtë humbje, Hoffenheimi e mbylli kampionatin në vendin e pestë me 61 pikë, duke mbetur jashtë Champions League, por duke siguruar pjesëmarrjen në garat evropiane.
