Vllaznia ka pësuar një humbje të rëndë 2-0 ndaj Dinamos në ndeshjen e parë të fazës “Final Four”, duke komplikuar ndjeshëm garën për titullin kampion në Shqipëri.
Skuadra shkodrane mbeti me 10 lojtarë në minutën e 69-të pas përjashtimit të Bajramit me kartonin e dytë të verdhë, moment që ndryshoi rrjedhën e takimit. Dinamo përfitoi nga superioriteti numerik dhe gjeti golin e avantazhit në minutën e 77-të me Malomon, ndërsa James vulosi fitoren në minutat shtesë.
Pas vërshëllimës përfundimtare, në stadium shpërtheu pakënaqësia e tifozëve të Vllaznisë. Nga tribunat u dëgjuan kore të forta “Turp, turp, turp!”, ndërsa një pjesë e tifozëve nuk lejuan lojtarët t’i afroheshin tribunës. Futbollistët më pas u drejtuan te grupimi “Vllaznit Ultras” për t’i përshëndetur.
Kjo humbje e lë Vllazninë nën presion në luftën për titull, ndërsa Dinamo rikthehet fuqishëm në garën kampionale me një fitore shumë të rëndësishme në “Final Four”.
