Gara për inkuadrim në Superligë në Ligën e Parë të Kosovës është bërë edhe më dramatike pas ndeshjeve të javës së 30-të.
Dinamo vazhdon të mbajë kreun e tabelës me 65 pikë, por Vushtrria mbetet shumë afër me 63 pikë pas fitores minimale 1:0 në udhëtim ndaj Istogut. Në vendin e tretë renditet Feronikeli 74 me 62 pikë, ndërsa Vëllaznimi mbetet i katërti me 61 pikë dhe vazhdon të jetë në garë të fortë për rikthim në elitë.
Liria gjithashtu nuk dorëzohet në garën për kreun, pasi renditet e pesta me 59 pikë, vetëm gjashtë pikë larg liderit.
Në ndeshjet e tjera të ditës, Prizreni shënoi fitore të thellë 5:1 ndaj KEK-ut, Trepça ’89 triumfoi 5:2 ndaj Suharekës, ndërsa Vjosa mori tri pikë të rëndësishme pas fitores 3:0 ndaj Trepçës.
Besa e Pejës dhe Rilindja 1974 barazuan 1:1 në një duel të luftuar.
Me vetëm disa javë deri në fund të sezonit, lufta për Superligë mbetet plotësisht e hapur, me pesë skuadra që vazhdojnë të ëndërrojnë promovimin.
