Sulmuesi kosovar Edon Zhegrova ka treguar përkushtim të madh ndaj skuadrës së tij, duke zgjedhur të punojë edhe gjatë ditëve të pushimit. Ndërsa trajneri Luciano Spalletti u kishte dhënë lojtarëve disa ditë për të pushuar, anësori vendosi të paraqitet në qendrën stërvitore të Juventus për të zhvilluar një seancë individuale.
Sipas raportimeve të mediave italiane, veçanërisht nga Tuttosport, Zhegrova ishte i vetmi futbollist që u paraqit në kompleksin stërvitor në Juventus Training Center Continassa. Aty ai zhvilloi një program të veçantë stërvitor në bashkëpunim me stafin e përgatitjes fizike, duke u fokusuar në aspektin fizik dhe rikuperimin.
Ky veprim është interpretuar si një sinjal i fortë nga lojtari, i cili dëshiron të tregojë seriozitet dhe gatishmëri për të fituar më shumë hapësirë në skuadër në fazën vendimtare të sezonit.
Brenda klubit bardhezi, përkushtimi i tij është vlerësuar pozitivisht, pasi rrallë ndodh që një futbollist të heqë dorë nga pushimi për të vazhduar punën në fushën stërvitore.
Tashmë mbetet për t’u parë nëse ky angazhim shtesë do të reflektohet edhe në performancat e ardhshme të Zhegrovës në fushë, në një moment kur ai synon të fitojë një rol më të rëndësishëm në skuadër.
