Real Madrid vazhdon të mbështetet fuqishëm te akademia e tij legjendare, La Fabrica, e cila prej vitesh është kthyer në një nga shtyllat kryesore të strategjisë sportive dhe financiare të klubit.
Jo vetëm që lojtarë si Raúl Asencio dhe Fran García janë shndërruar në pjesë të rëndësishme të ekipit të parë, por akademia madrilene ka prodhuar edhe përfitime të mëdha ekonomike. Emra si Nico Paz, Jacobo Ramón dhe Chema Andrés i kanë sjellë fitime të konsiderueshme klubit, ndërsa falë klauzolave të riblerjes, ata mbeten opsione për t’u rikthyer në të ardhmen si lojtarë më të pjekur.
Ky model ka rezultuar tejet i suksesshëm dhe Real Madrid synon ta vazhdojë edhe në vitet në vijim.
Një nga talentet që pritet të arrijë drejtpërdrejt ekipin e parë, pa kaluar më parë në huazime apo shitje, është Leo Lemaitre. Vetëm 16 vjeç, ai konsiderohet si një nga “perlat” më premtuese të La Fabrica dhe tashmë po krahasohet me mbrojtësin e ekipit të parë, Dean Huijsen.
Besimi i klubit ndaj Lemaitre është konkretizuar me nënshkrimin e një kontrate të re deri në vitin 2028, siç raporton Diario AS. Sipas këtij raportimi, kontrata përfshin një klauzolë lirimi prej 100 milionë eurosh, shifër që zakonisht u rezervohet vetëm lojtarëve kryesorë të ekipit të parë.
Ky vendim vjen si pasojë e interesimit serioz nga klube të njohura në Angli dhe Francë, megjithatë thuhet se dëshira e vetë lojtarit ka qenë e qartë: të vazhdojë zhvillimin e tij në Valdebebas.
Përveç zhvillimit në nivel klubi, Lemaitre ndodhet edhe në qendër të një “beteje” sportive për përfaqësimin ndërkombëtar mes Spanjës dhe Francës, një tjetër tregues i nivelit të lartë të vlerësimit që gëzon në arenën evropiane.
Së bashku me emra si Huijsen, Asencio dhe Joan Martínez, Leo Lemaitre shihet si pjesë e një bërthame të re mbrojtësish qendrorë, që synojnë të lënë gjurmë në Santiago Bernabéu në vitet e ardhshme
