E ardhmja e trajnerit të Juventus, Luciano Spalletti, pritet të varet nga përballja vendimtare ndaj Galatasaray në Ligën e Kampionëve.
Bianconerët do të zbresin në fushë të mërkurën për ndeshjen e kthimit të “play-offit”, në një moment delikat të sezonit. Forma e fundit e skuadrës nga Torino ka ngritur pikëpyetje të mëdha, pasi në pesë ndeshjet e fundit në të gjitha garat Juventusi ka regjistruar katër humbje dhe vetëm një barazim.
Sipas raportimeve nga La Gazzetta dello Sport, pozita e Spallettit është seriozisht në rrezik. Mediumi italian shkruan se drejtuesit e klubit presin një reagim të fortë dhe një fitore bindëse ndaj gjigantit turk. Çdo rezultat tjetër përveç triumfit mund të çojë në një ndarje të menjëhershme mes palëve.
Madje, nuk përjashtohet mundësia që tekniku 66-vjeçar të mos jetë në stol për sfidën e fundjavës ndaj AS Roma, nëse Juventusi dështon të përmbushë pritshmëritë në Evropë.
Deri më tani, Spalletti e ka udhëhequr Juventusin në 25 ndeshje këtë sezon, duke regjistruar 13 fitore, gjashtë barazime dhe gjashtë humbje. Megjithatë, seria negative e javëve të fundit ka shtuar presionin mbi stafin teknik.
Përballja ndaj Galatasarayt nuk është vetëm një ndeshje evropiane – është një provë e madhe për projektin aktual të Juventusit dhe për vetë të ardhmen e Spallettit në krye të skuadrës.
