Një zhvillim i rëndësishëm po merr formë në merkato, teksa Igli Tare synon të përforcojë Milanin me një emër të madh nga Barcelona.
Bëhet fjalë për sulmuesin polak Robert Lewandowski, kontrata e të cilit me klubin katalanas përfundon në qershor. Në këtë situatë, 37-vjeçari pritet të jetë një mundësi e artë për klubet e mëdha evropiane.
Sipas raportimeve nga Spanja, Barcelona dëshiron ta mbajë në skuadër sulmuesin me përvojë, por me kushtin e një uljeje të ndjeshme të pagës. Deri më tani, nuk ka një vendim përfundimtar nga ana e lojtarit.
Kjo situatë ka zgjuar interes të madh në Itali, ku përveç Milanit, edhe Juventus ka hyrë seriozisht në garë për shërbimet e Lewandowskit. Të dy klubet e shohin atë si një përforcim ideal për repartin ofensiv.
Brenda drejtuesve të Milanit ekziston bindja se Lewandowski mund të japë ende nivel të lartë për të paktën edhe dy sezone në Serie A, duke e bërë këtë operacion një investim strategjik.
