Arbër Zeneli mund të jetë një nga futbollistët shqiptarë që do të ndryshojë ambient gjatë këtij afati kalimtar dimëror. Sulmuesi i krahut është pranë largimit nga Elfsborgu, pas një oferte shumë joshëse që vjen nga kampionati elitar i Arabisë Saudite.
Sipas mediumit suedez Expressen, klubi saudit Al Taawoun ka paraqitur një ofertë serioze për 30-vjeçarin, e cila pritet të pranohet nga vetë lojtari. Zeneli duket i gatshëm të mbyllë aventurën e tij në Suedi dhe të nisë një kapitull të ri në Lindjen e Mesme.
Futbollisti shqiptar u rikthye te Elfsborgu në mars të vitit 2024, pas një eksperience në futbollin turk me Adana Demirspor. Më herët, ai ka qenë pjesë edhe e kampionatit francez, ku ka luajtur për Reims. Megjithatë, vetëm dy vite pas rikthimit në Suedi, Zeneli pritet të largohet sërish.
Raportohet se bisedimet mes klubeve dhe përfaqësuesve të lojtarit janë aktualisht në zhvillim, ndërsa afati kalimtar dimëror në Arabinë Saudite mbyllet më 1 shkurt, çka e bën këtë lëvizje të mundshme në ditët në vijim.
Aktualisht, Al Taawoun renditet në vendin e pestë në kampionatin elitar saudit, vetëm pesë pikë larg Al Nassr, skuadrës së Cristiano Ronaldos, e cila mban pozitën e tretë në tabelë.
Ndërkohë, Elfsborgu ka pësuar edhe një tjetër largim të rëndësishëm gjatë këtij afati kalimtar, pasi Besfort Zeneli, vëllai i vogël i Arbërit, është transferuar te Royale Union Saint-Gilloise në kampionatin belg për një shumë rreth 4 milionë euro.
Një largim i mundshëm i Arbër Zenelit do të përbënte një tjetër ndryshim të madh për Elfsborgun, ndërsa për futbollistin shqiptar do të ishte një hap i rëndësishëm drejt një sfide të re në karrierën e tij.
