Arsenal F.C. ka siguruar finalen e madhe të Champions League, pasi mposhti Atlético Madrid me rezultat 1:0 në “Emirates Stadium”, duke vulosur kualifikimin pas barazimit 1:1 në ndeshjen e parë.
Takimi nisi me ritëm të lartë dhe me raste nga të dyja skuadrat. Atletico kërcënoi që në minutat e para me Alvarez, ndërsa portieri David Raya reagoi në mënyrë spektakolare për të mbajtur portën e paprekur.
Arsenali u kundërpërgjigj me Gabriel Magalhães, i cili goditi traversën, ndërsa londinezët kërkuan edhe penallti pas një dueli me Leandro Trossard, por gjyqtari vazhdoi lojën.
Momenti vendimtar erdhi në minutën 45+1, kur Bukayo Saka përfitoi nga një top i kthyer prej Jan Oblak dhe e dërgoi në rrjetë për 1:0.
Në pjesën e dytë, Atletico tentoi të rikthehej në lojë me Griezmann dhe Alvarez, por Raya ishte sërish në mbrëmje fantastike. Nga ana tjetër, Arsenali ishte shumë pranë golit të dytë me Ødegaard dhe Gyökeres, por rezultati mbeti i pandryshuar.
Në fund, skuadra e Mikel Artetës festoi kualifikimin historik në finalen e Champions League, ku do të përballet me fituesin e çiftit Paris Saint-Germain F.C. – FC Bayern Munich.
Finalja e madhe do të zhvillohet në Puskás Aréna më 30 maj.
