Dy javë para fundit të kampionatit gjerman, Bundesliga vazhdon të mbetet një nga ligat më dramatike në Evropë, me garë të hapur si për Ligën e Kampionëve, ashtu edhe për mbijetesë.
Bayer Leverkuseni, Stuttgarti dhe Hoffenheimi po zhvillojnë një betejë të fortë për pozitën e katërt, e cila siguron pjesëmarrjen në edicionin e ardhshëm të Ligës së Kampionëve. Të tri skuadrat kanë nga 58 pikë dhe çdo ndeshje mund të jetë vendimtare.
Sfida më e rëndësishme e javës luhet mes Stuttgartit dhe Leverkusenit, ndërsa Hoffenheimi i reprezentuesve kosovarë Fisnik Asllani, Leon Avdullahu dhe Albian Hajdari përballet në shtëpi me Werder Bremenin.
Në anën tjetër, pesë skuadra po luftojnë për t’i shpëtuar rënies nga elita. Werder Bremeni dhe Kolni kanë nga 32 pikë, Union Berlini ka 33, ndërsa Wolfsburgu ndodhet në pozitën e plejautit me 26 pikë. St. Pauli është një pozitë më poshtë, kurse Heidenheimi mban vendin e fundit me 23 pikë.
Kampioni i shpallur tashmë, Bayerni, luan në udhëtim ndaj Wolfsburgut, skuadër që ende shpreson të mbetet në Bundesligë.
Me vetëm dy xhiro të mbetura, çdo pikë ka peshë të madhe dhe fundi i sezonit në Gjermani pritet të sjellë emocione deri në sekondat e fundit.
