Dukagjini dhe Ferizaj janë finalistët e këtij edicioni të Kupës së Kosovës, pasi eliminuan Ballkanin dhe Llapin në gjysmëfinale, duke dhuruar ndeshje plot emocione, gola dhe tension.
Skuadra nga Klina konfirmoi formën e shkëlqyer duke mposhtur Ballkanin me rezultat 3:2 në ndeshjen kthyese, për të kaluar tutje me rezultat të përgjithshëm 6:2. Ndeshja në stadiumin “18 Qershori” ishte spektakolare, me raste të shumta dhe ritëm të lartë. Pas avantazhit fillestar të vendasve, Ballkani reagoi edhe pse me një lojtar më pak pas përjashtimit të Albert Dienes, duke barazuar përkohësisht rezultatin. Megjithatë, Dukagjini gjeti forcën për golin vendimtar në minutat e fundit, duke vulosur kalimin në finale.
Në anën tjetër, Ferizaj siguroi finalen pas një përballjeje të tensionuar ndaj Llapit. Ndeshja u ndërpre përkohësisht për shkak të incidenteve dhe hedhjes së gjësendeve në fushë, por rifilloi pas largimit të tifozëve nga tribunat. Pavarësisht kaosit, Ferizaj menaxhoi rezultatin dhe përfitoi nga fitorja 2:1 në ndeshjen e parë, duke siguruar kualifikimin për në finale.
Kjo finale do të vendosë përballë dy skuadra me histori dhe ambicie të mëdha, ku Dukagjini synon trofeun e parë pas disa finaleve të humbura, ndërsa Ferizaj rikthehet në një mundësi të artë për të shkruar historinë në Kupën e Kosovës.
