Drita ka marrë një tjetër goditje të rëndë para përballjeve historike ndaj Celjes në Conference League. Pas konfirmimit për mungesën e Rron Brojës, tashmë është bërë e ditur se edhe Arb Manaj nuk do të jetë në dispozicion për ndeshjen e parë ndaj skuadrës sllovene.
Sulmuesi i Dritës do ta humbasë takimin e parë, ndërsa paraqitja e tij në sfidën e kthimit në Slloveni mbetet seriozisht në dyshim. Gjendja e tij fizike do të vlerësohet në ditët në vijim, por gjasat për rikthim të shpejtë nuk duken optimiste.
Mungesa e Manajt pritet të jetë një goditje e madhe për ekipin, duke pasur parasysh formën e tij të shkëlqyer në këtë edicion të Conference League.
Ai ka qenë një nga lojtarët kyç dhe ndër më të mirët e Dritës në arenën evropiane këtë sezon. Me dy mungesa të rëndësishme në prag të ndeshjeve vendimtare, trajneri i Dritës do të duhet të gjejë zgjidhje alternative për të përballuar një kundërshtar cilësor si Celje.
Tifozët shpresojnë që Manaj të rikuperohet sa më shpejt dhe të rikthehet më i fortë në fushë në momentet më të rëndësishme të sezonit.
