Dy futbollistët me origjinë shqiptare, Kushtrim Asallari dhe Arianit Ferati, ishin protagonistë absolutë në fitoren 2-1 të Mannheim ndaj Ulm, në ndeshjen e vlefshme për javën e 23-të të Ligës së Tretë në Gjermani.
Mesfushori 28-vjeçar Arianit Ferati shkëlqeu në rolin e organizatorit, duke asistuar të dy golat e skuadrës së tij dhe duke udhëhequr lojën në mesfushë. Kontributi i tij ishte vendimtar në suksesin e Mannheim, duke konfirmuar formën e mirë që po kalon këtë sezon.
Ndërkohë, sulmuesi 22-vjeçar Kushtrim Asallari shënoi golin e dytë në minutën 45+4, gol që rezultoi edhe vendimtar për fitoren. Ky ishte goli i dytë radhazi për Asallarin në kampionat, në 10 ndeshje të zhvilluara deri tani.
Në aspektin statistikor, Ferati ka regjistruar 6 asistime dhe 2 gola në 20 paraqitje këtë sezon, ndërsa Asallari po rrit vazhdimisht ndikimin e tij në repartin ofensiv të Mannheim.
