Interi ka siguruar kualifikimin në gjysmëfinale të Kupës së Italisë, pasi ka mposhtur Torinon me rezultat 2:1 në ndeshjen çerekfinale të zhvilluar në stadiumin e Monzas.
Skuadra e drejtuar nga Cristian Chivu u shfaq e organizuar dhe efikase në momentet kyçe të takimit. Zikaltërit kaluan në epërsi në minutën e 35-të, kur Ange-Yoan Bonny realizoi me kokë pas një asistimi të saktë nga krahu, duke i dhënë Interit avantazhin në fund të pjesës së parë.
Në fillimin e fraksionit të dytë, Interi dyfishoi shifrat. Në minutën e 48-të, Andy Diouf përfitoi nga një aksion i ndërtuar mirë dhe dërgoi topin në rrjetë, duke i dhënë qetësi skuadrës së tij. Torino reagoi në minutën e 57-të, kur Sandro Kulenovic shënoi me kokë, duke rihapur garën për kualifikim.
Megjithatë, pavarësisht presionit të vazhdueshëm në minutat e mbetura, Interi arriti ta menaxhojë me maturi rezultatin dhe të ruajë epërsinë deri në fund.
Me këtë fitore, Interi konfirmon objektivin për të luftuar deri në fund për trofeun e Kupës së Italisë, pavarësisht një kalendari të ngarkuar dhe mungesave të rëndësishme në skuadër.
