Romina, bashkëshortja e këngëtarit Erik Lloshi, ka reaguar për herë të parë publikisht pas aludimeve se marrëdhënia e çiftit është krisur për shkak të pjesëmarrjes së artistit në edicionin aktual të Big Brother VIP Albania.
E ftuar në emisionin “Fan Club”, Romina sqaroi se hyrja e Erik Lloshit në BBVA nuk ishte një vendim i përbashkët, pasi ajo kishte qenë kundër këtij hapi që në fillim. Megjithatë, ajo theksoi se aktualisht e mbështet plotësisht bashkëshortin e saj, pavarësisht se nuk është dakord me disa nga sjelljet e tij brenda shtëpisë.
“Nuk kam qenë kurrë dakord që të futej në Big Brother. Jam larg televizionit dhe nuk e kam dashur ekspozimin publik. Kam preferuar që jeta ime personale të mbetet private dhe jo në sytë e publikut”, u shpreh Romina.
Ajo shtoi se temperamenti i fortë i Erik Lloshit ka qenë një nga arsyet kryesore pse ishte kundër pjesëmarrjes së tij në reality show. “Eriku është gjaknxehtë dhe me temperament të vështirë. Pikërisht për këtë arsye i kam thënë të mos hynte në Big Brother, sepse aty njerëzit luajnë me çdo kartë. Ai është një njeri shumë i drejtë dhe jo aq agresiv sa po portretizohet”.
Romina zbuloi se këngëtari kishte marrë ftesa edhe më herët për t’u bërë pjesë e formatit, por ajo kishte refuzuar kategorikisht. “Këtë herë nuk më dëgjoi. I thashë se do të merrja valixhet dhe do të largohesha”, tregoi ajo.
Megjithatë, ajo theksoi se qëndrimi i saj ka ndryshuar dhe se tani që Eriku është pjesë e BBVA-së, mbështetja e saj është e plotë. “Tashmë e mbështes totalisht, pa asnjë diskutim. Ka gjëra tek Eriku që më pëlqejnë shumë dhe disa që nuk i përkrah”, përfundoi Romina.
Deklarata e saj ka hedhur poshtë zërat për një ndarje mes çiftit, duke sqaruar se, pavarësisht mosmarrëveshjeve, marrëdhënia e tyre vazhdon.
