Harry Kane është shumë afër ta vazhdojë kontratën me Bayern Munichun, me palët që pritet së shpejti ta finalizojnë marrëveshjen e re që do ta mbajë sulmuesin anglez në “Allianz Arena” deri në verën e vitit 2028.
Sipas raportimeve nga mediat, negociatat mes përfaqësuesve të lojtarit dhe drejtuesve të klubit gjerman janë në fazën përfundimtare, ndërsa ekziston optimizëm i madh që marrëveshja të zyrtarizohet brenda një periudhe të shkurtër.
Edhe pse aktualisht ka kontratë valide deri në vitin 2027, Bayerni dëshiron ta sigurojë qëndrimin afatgjatë të sulmuesit, duke i ofruar atij kushte të përmirësuara dhe rol qendror në projektin sportiv të klubit.
Kane iu bashkua Bayernit në vitin 2023 nga Tottenhami për shumën e 100 milionë eurove, duke u shndërruar menjëherë në lider të repartit ofensiv. Performancat e tij kanë justifikuar plotësisht investimin e klubit.
Këtë sezon, anglezi ka realizuar 39 gola dhe ka dhuruar 5 asistime në 34 paraqitje në të gjitha garat, duke konfirmuar edhe një herë statusin e tij si një nga sulmuesit më produktivë në futbollin evropian.
