Legjenda e futbollit çek, Pavel Nedved, ka komentuar ndeshjen miqësore që Kombëtarja e Çekisë do ta zhvillojë ndaj Kosovës më 31 maj në stadiumin “Epet Arena” në Pragë.
Ish-fituesi i “Topit të Artë”, i cili aktualisht mban postin e menaxherit të përgjithshëm të përfaqësueses çeke, e ka cilësuar përballjen ndaj “Dardanëve” si një test të rëndësishëm para Kupës së Botës 2026.
Sipas Nedvedit, kjo do të jetë ndeshja e fundit e Çekisë para udhëtimit drejt SHBA-së për Botërorin dhe një mundësi ideale për t’u përshëndetur me tifozët vendas.
“Mezi presim të kthehemi në ‘Letna’, ku e fituam finalen e plejofit ndaj Danimarkës. Besojmë se stadiumi do të krijojë atmosferë të shkëlqyer edhe për ndeshjen ndaj Kosovës, që është testi ynë i fundit para Kupës së Botës”, ka deklaruar Nedved.
Federata çeke pret një përballje interesante ndaj Kosovës, duke vlerësuar paraqitjet e mira të “Dardanëve” në kualifikime dhe në ndeshjet e fundit miqësore.
Ndeshja Çeki – Kosovë do të zhvillohet më 31 maj dhe pritet të nisë nga ora 16:00.
