Argjentina është futur në ankth vetëm pak javë para Kupës së Botës 2026, pasi Lionel Messi u largua i dëmtuar nga ndeshja e Inter Miami në MLS.
Ylli argjentinas u zëvendësua në minutën e 73-të gjatë triumfit spektakolar 6-4 ndaj Philadelphia Union, pasi ndjeu shqetësime në muskulin e kofshës së majtë.
Messi kishte zhvilluar një tjetër paraqitje të madhe, duke dhuruar dy asistime për skuadrën e tij, por momenti i dëmtimit ka alarmuar jo vetëm Inter Miami, por edhe gjithë Argjentinën para nisjes së Botërorit.
Kamerat kapën 38-vjeçarin duke prekur vazhdimisht pjesën e kofshës së majtë, ndërsa më pas ai nuk u ul as në stolin e rezervistëve, duke shtuar edhe më shumë dyshimet për gjendjen e tij fizike.
Deri tani nuk ka një diagnozë zyrtare për shkallën e dëmtimit, por mediat ndërkombëtare raportojnë se Messi ka pasur probleme të ngjashme muskulore edhe më herët gjatë periudhës së tij te Inter Miami.
Për Argjentinën, çdo shqetësim fizik i Messit konsiderohet alarm kombëtar, sidomos në prag të Kupës së Botës ku kampionët në fuqi synojnë të mbrojnë trofeun.
