Muaji mars po shënohet me një iniciativë simbolike që përçon 31 mesazhe përgjatë 31 ditëve, me pjesëmarrjen e figurave të njohura publike, të bashkuara rreth një kauze të përbashkët: drejtësi, barazi dhe fuqizim për gratë dhe vajzat.
Kësaj nisme i është bashkuar edhe futbollisti kosovar Milot Rashica, i cili përmes një mesazhi publik ka shprehur mbështetjen e tij për avancimin e të drejtave të grave dhe për luftimin e çdo forme të dhunës me bazë gjinore.
Fushata organizohet në kuadër të projektit të UN Women me titull “Adresimi i ndikimit të dhunës me bazë gjinore në Kosovë dhe fuqizimi i të mbijetuarve për të tejkaluar stigmën dhe për të folur hapur”. Qëllimi i projektit është rritja e ndërgjegjësimit në shoqëri, fuqizimi i të mbijetuarve dhe krijimi i një ambienti më të sigurt dhe më mbështetës për gratë dhe vajzat në Kosovë.
Iniciativa mbështetet nga British Embassy Pristina, e cila prej vitesh përkrah projekte që promovojnë barazinë gjinore dhe mbrojtjen e të drejtave të njeriut në vend.
Pjesëmarrja e Rashicës në këtë fushatë konsiderohet një mesazh i fuqishëm sensibilizues, duke shfrytëzuar ndikimin e tij publik për të promovuar respektin, solidaritetin dhe barazinë në shoqëri.
