Rey Manaj ka nisur zyrtarisht një kapitull të ri në karrierën e tij. Sulmuesi i Kombëtares shqiptare ka arritur marrëveshje me klubin kinez Zhejiang FC, duke nënshkruar një kontratë dyvjeçare me një përfitim financiar mbresëlënës, që kap vlerën e 4 milionë eurove në sezon.
Pas një aventure të shkurtër në Emiratet e Bashkuara Arabe me Al Sharjah, Manaj ka vendosur të ndryshojë kontinent dhe të vazhdojë karrierën në kampionatin kinez, ku pritet të ketë një rol kyç në repartin ofensiv të skuadrës së re.
Transferimi i tij konsiderohet një nga lëvizjet më të bujshme të merkatos për një futbollist shqiptar, ndërsa Zhejiang FC synon të ndërtojë ekipin rreth sulmuesit lushnjar, duke i besuar atij përgjegjësi të mëdha në objektivat e sezonit.
Ky hap i ri përfaqëson jo vetëm një sfidë sportive për Rey Manajn, por edhe një kontratë që e rendit atë mes futbollistëve shqiptarë më të paguar në arenën ndërkombëtare.
