KF Tirana po kalon një nga periudhat më të vështira të viteve të fundit, pasi problemet financiare kanë rikthyer klubin në vëmendjen e FIFA-s. Sipas raportimeve të fundit, bardheblutë kanë humbur gjashtë çështje në dhomën e zgjidhjes së konflikteve në FIFA, të lidhura kryesisht me paga të papaguara ndaj ish-lojtarëve dhe anëtarëve të ekipit.
Situata është rënduar ndjeshëm gjatë ditëve të fundit, teksa merkatoja e klubit është bllokuar sërish, duke e bërë të pamundur regjistrimin e përforcimeve të reja pa u zgjidhur më parë detyrimet financiare.
Vendimi i parë negativ për Tiranën këtë vit ishte regjistruar më 3 mars, ndërsa goditja më e fundit administrative ka ardhur më 8 maj. Klubi kryeqytetas tashmë ndodhet nën presion të madh për të shlyer dosjet aktive dhe për të shmangur komplikime të tjera para nisjes së sezonit të ri.
Në listat e FIFA-s figurojnë edhe klube të tjera shqiptare me çështje të hapura, ku Vllaznia dhe Bylisi kanë nga një rast aktiv, por situata e Tiranës mbetet më problematikja.
Ky kolaps administrativ vjen pas një sezoni të vështirë edhe në aspektin sportiv. Tirana luftoi deri në javët e fundit për mbijetesë në Superiore dhe e mbylli kampionatin në vendin e gjashtë me 44 pikë.
Tashmë drejtuesit e klubit duhet të gjejnë zgjidhje të shpejtë për të shmangur një paralizë të plotë të skuadrës përpara fillimit të përgatitjeve për sezonin e ardhshëm.
