Tirana vazhdon të jetë shumë aktive në merkaton e janarit dhe është pranë finalizimit të një tjetër përforcimi të rëndësishëm. Bëhet fjalë për mbrojtësin kroat Anton Kresic, i cili pritet të veshë fanellën bardheblu në ditët në vijim.
Sipas burimeve pranë klubit, Kresic do të transferohet te Tirana në formë huazimi nga CFR Cluj deri në fund të sezonit, me synimin për të forcuar ndjeshëm repartin defensiv.
29-vjeçari është produkt i akademisë së Atalantës dhe ka një eksperiencë të pasur në disa kampionate europiane. Ai ka luajtur për klube të njohura si Rijeka, Padova, Avellino, Cremonese, Trapani dhe vetë CFR Cluj, duke grumbulluar një numër të lartë paraqitjesh në karrierë.
Gjatë karrierës së tij profesionale, Anton Kresic ka regjistruar gjithsej 232 paraqitje zyrtare, ku ka shënuar 23 gola dhe ka dhënë 8 asistime – statistika mjaft pozitive për një mbrojtës qendror.
Me këto lëvizje, Tirana konfirmon ambiciet e saj për pjesën e dytë të sezonit, duke synuar stabilitet dhe forcë në mbrojtje për të qenë konkurruese në objektivat e mbetura.
