Kapiteni i Liverpool FC, Virgil van Dijk, ka shprehur publikisht dëshirën që Mohamed Salah të vazhdojë karrierën në “Anfield”, pas paraqitjes vendimtare të sulmuesit në fitoren 3-0 ndaj Brighton & Hove Albion në FA Cup.
Salah realizoi një gol dhe dhuroi një asist, duke ndihmuar “The Reds” të sigurojnë kualifikimin në raundin e pestë të kompeticionit. 33-vjeçari ka qenë në qendër të diskutimeve muajt e fundit, sidomos pas deklaratave në dhjetor, kur u shpreh se ishte “hedhur nën autobus” nga klubi dhe la të kuptohej për një raport të tensionuar me trajnerin Arne Slot.
Megjithatë, që nga rikthimi nga Kupa e Afrikës në janar, egjiptiani ka rifituar rolin e padiskutueshëm në formacion. Ai ka nisur si titullar në çdo ndeshje, duke shënuar dy gola dhe duke dhënë katër asiste në këtë periudhë. Penalltia ndaj Brighton ishte goli i tij i shtatë sezonal, ndërsa në sezonin e kaluar ai realizoi 34 gola dhe kontribuoi ndjeshëm në triumfin e Liverpoolit në Premier League.
Salah ka kontratë deri në vitin 2027, por e ardhmja e tij mbetet temë e hapur për shkak të interesimit të vazhdueshëm nga klubet e Arabisë Saudite, përfshirë Al-Ittihad Club.
Van Dijk theksoi rëndësinë e bashkëlojtarit për skuadrën:
“Mo është ende lider dhe shumë i rëndësishëm për mua si kapiten. Ai i jep ekipit më shumë se gola. Standardet që ka vendosur janë aq të larta, sa kur nuk shënon rregullisht, kritikat vijnë menjëherë.”
Mbrojtësi holandez shtoi se shpreson që Salah të qëndrojë në “Anfield”, duke nënvizuar se kanë përjetuar momente të mëdha së bashku dhe se egjiptiani mbetet një nga figurat qendrore të projektit të Liverpoolit.
Me 252 gola që nga transferimi i tij në vitin 2017, Salah vazhdon të shkruajë histori me fanellën e “The Reds”, ndërsa vendimi për të ardhmen e tij pritet të jetë një nga çështjet më të diskutuara në merkaton e verës.
