Sulmuesi shqiptar Arbër Hoxha është objekt interesimi të madh në merkato, me Galatasarayin që ka dërguar një ofertë zyrtare për të, por Dinamo Zagrebi nuk është e gatshme ta lërë të largohet në këtë fazë të sezonit.
Sipas raportimeve nga mediat turke dhe kroate, klubi kroat e konsideron Hoxhën një pjesë kyçe të skuadrës dhe synon ta mbajë atë për pjesën pranverore të kampionatit. Kontributi i 27-vjeçarit në fazën vjeshtore ka qenë i lartë, dhe pritshmëritë janë që ai të vazhdojë të luajë rol vendimtar në muajt e ardhshëm.
Edhe pse oferta e Galatasarayt është konkrete, një largim aktualisht nuk duket i mundur. Raportohet se një propozim më bindës nga Fenerbahçe – pjesë e një marrëveshjeje që lidhet edhe me portierin Dominik Livakovic – do të ishte më i pranueshëm për Dinamon. Situata mund të ndryshojë vetëm nëse paraqitet një ofertë financiare e konsiderueshme para mbylljes së merkatos.
Arbër Hoxha ka kontratë me Dinamo Zagrebin deri në qershor 2029, ndërsa vlera e tij në treg, sipas Transfermarkt, vlerësohet rreth 2.5 milionë euro.
Përveç Galatasarayt, interes për shërbimet e Hoxhës ka shfaqur edhe Hull City, duke e bërë situatën e merkatos së tij një nga temat më të nxehta të sezonit.
