Skitarja amerikane Lindsey Vonn pësoi një rrëzim dramatik gjatë garës së zbritjes për femra në Lojërat Olimpike Dimërore Milano–Cortina 2026 dhe u transportua me helikopter për trajtim mjekësor, vetëm disa sekonda pas nisjes së garës.
Vonn, 41 vjeçe, kishte vendosur të merrte pjesë në garë pavarësisht se vetëm nëntë ditë më parë kishte pësuar këputje të plotë të ligamentit kryqëzuar (ACL) në gjurin e majtë gjatë një gare të Kupës së Botës në Zvicër dhe ishte rikthyer në pistë me mbështetje nga mjekët dhe një mbërthyes (brace) në gju.
Gara u zhvillua në pistën Olimpia delle Tofane në Cortina d’Ampezzo, ku Vonn njihet si një prej skitareve më të suksesshme në historinë e disiplinës. Mirëpo ajo humbi kontrollin rreth 13 sekonda pas nisjes duke kapur një portë me shpatullën e djathtë dhe u përplas me forcë në pistë. Mjeket intervenuan menjëherë dhe më pas Vonn u evakuua me helikopter për në spital për vlerësime të mëtejshme. Nuk ka informacion të qartë për gjendjen e saj të tanishme shëndetësore.
Rrëzimi i Vonn-it pati një ndikim emocional në stadium, ndërsa garuesit e tjerë dhe publiku ndoqën me shqetësim ndërhyrjen e ekipit mjekësor.
Pjesëmarrja e Vonn në disiplinën super-G, e cila është planifikuar të zhvillohet më vonë në program, mbetet e pasigurt dhe do të varet nga vlerësimet e stafit mjekësor pas këtij incidenti.
