Brazili po përgatitet për ndeshjen vendimtare të fazës së grupeve në Kupën e Botës 2026 ndaj Skocisë, ndërsa trajneri Carlo Ancelotti ka konfirmuar se Neymar do të jetë i gatshëm për këtë sfidë.
“Seleção” vjen në këtë përballje pas fitores bindëse 3-0 ndaj Haitit dhe synon ta mbyllë grupin në vendin e parë. Në konferencën për shtyp, Ancelotti bëri të ditur se mund të ketë ndryshime në formacion për ndeshjen e 24 qershorit.
“Nuk dua të jap një identitet përfundimtar. Mund të ndryshoj diçka në ndeshjen e ardhshme”, deklaroi tekniku italian.
Ai theksoi se objektivi kryesor i Brazilit mbetet fitorja ndaj Skocisë dhe sigurimi i kreut të grupit.
“Duam të mposhtim Skocinë për ta përfunduar grupin në vendin e parë. Do të jetë shumë e rëndësishme për vazhdimin e turneut”, tha Ancelotti.
Trajneri brazilian paralajmëroi gjithashtu se Skocia është një kundërshtar i vështirë, i aftë të krijojë probleme edhe ndaj skuadrave më të forta.
Lajmi më i mirë për tifozët brazilianë mbetet rikthimi i Neymarit. Sulmuesi kishte munguar në dy ndeshjet e para për shkak të një dëmtimi, por tashmë është gati të rikthehet në dispozicion të ekipit.
“Ai është mirë. Do të stërvitet i vetëm për një ditë dhe më pas do t’i bashkohet grupit. Do të jetë i gatshëm për Skocinë”, konfirmoi Ancelotti.
Në anën tjetër, shqetësim mbetet gjendja e Raphinhas, i cili u largua nga ndeshja ndaj Haitit për shkak të një dëmtimi dhe ende pret vlerësimin e stafit mjekësor.
Në fund, Ancelotti mbrojti edhe pushimet e hidratimit gjatë ndeshjeve të Botërorit.
“Më pëlqejnë këto ndërprerje. Me temperaturat e larta, lojtarët rikuperohen më mirë dhe trajnerët kanë mundësi të bëjnë rregullime taktike”, u shpreh ai.
Brazili do të kërkojë ndaj Skocisë jo vetëm kualifikimin në fazën tjetër, por edhe vendin e parë në grup, duke synuar të vazhdojë rrugëtimin drejt trofeut me moral të lartë.
