Pjesëmarrja e Iranit në Kupën e Botës 2026 është shoqëruar me polemika dhe vështirësi të shumta jashtë fushës së lojës. Pas barazimit 2:2 ndaj Zelandës së Re në ndeshjen e parë, Federata Iraniane e Futbollit ka paraqitur një ankesë zyrtare në FIFA lidhur me trajtimin që po i bëhet ekipit gjatë qëndrimit në Amerikën e Veriut.
Sipas mediave iraniane, kombëtarja nuk është lejuar të qëndrojë gjatë natës në territorin e Shteteve të Bashkuara dhe është detyruar të vendosë bazën e saj në Tijuana të Meksikës, duke udhëtuar për çdo ndeshje drejt Los Angelesit.
Ky organizim ka krijuar vështirësi të konsiderueshme logjistike për skuadrën. Para sfidës ndaj Zelandës së Re, lojtarët dhe stafi teknik kaluan një udhëtim të lodhshëm, mes fluturimeve dhe procedurave të gjata të kontrollit kufitar, duke mbërritur në stadium vetëm pas disa orësh rrugëtim.
Sipas raportimeve, Federata Iraniane kishte kërkuar që ekipi të lejohej të qëndronte të paktën një natë në Los Angeles pas ndeshjes, por autoritetet nuk e miratuan kërkesën. Madje, sipas pretendimeve të iranianëve, edhe ndërhyrja e presidentit të FIFA-s, Gianni Infantino, nuk solli ndryshim të vendimit.
Pakënaqësinë e tyre e shprehën publikisht edhe trajneri Amir Ghalenoei dhe kapiteni Mehdi Taremi, të cilët theksuan se këto kushte po ndikojnë drejtpërdrejt në përgatitjen e ekipit.
Tensionet pritet të vazhdojnë edhe para përballjes së rëndësishme me Belgjikën më 21 qershor. Irani pretendon se do të lejohet të mbërrijë në Los Angeles vetëm një ditë para ndeshjes, duke e konsideruar këtë një disavantazh serioz sportiv.
Kështu, çështja ka kaluar kufijtë e futbollit dhe tashmë është kthyer në një debat që përfshin sportin, politikën dhe marrëdhëniet ndërkombëtare, ndërsa FIFA pritet të japë qëndrimin e saj për ankesën e federatës iraniane.
